‘एक दर्जन सिमेन्ट उद्योग बन्द भइसके, थप आधा दर्जन बन्द हुने अवस्थामा छन्’

२०७२ सालको भूकम्पपछि निजी क्षेत्रले सिमेन्ट उद्योगमा व्यापक लगानी गर्‍यो । फलस्वरुपः एक समय सिमेन्ट उद्योगको सङ्ख्या ६५ पुगेको थियो । तर, सिमेन्टमा आएको लगानी अनुरूप निर्माण गतिविधि नहुँदा धमाधम उद्योगहरू बन्द हुने स्थितिमा पुगेका छन् ।

निजी क्षेत्रले वार्षिक २० लाख टनसम्म सिमेन्ट उत्पादन क्षमता बनाए पनि सरकारले पूर्वाधार क्षेत्रलाई प्राथमिकतामा नराख्दा ८ लाख टन हाराहारी प्रतिवर्ष मात्रै खपत हुँदै आइरहेको व्यवसायीहरू बताउँछन् । सोहीकारण, ६५ वटामध्ये झण्डै एक दर्जन उद्योग बन्द भइसकेको सिमेन्ट उत्पादक संघ बताउँछ । थप आधा दर्जन बराबर सिमेन्ट उद्योग समेत बन्द हुने संघारमा रहेको संघको भनाई छ ।