४० मेगावाट क्षमताको राहुघाट जलविद्युत आयोजनाले थाल्यो परीक्षण उत्पादन

काठमाडौं । म्याग्दीको रघुगङ्गा गाउँपालिकामा निर्माण भएको ४० मेगावाट क्षमताको राहुघाट जलविद्युत आयोजनाले बुधबारदेखि परीक्षण उत्पादन थालेको छ। आयोजनाका भौतिक संरचना निर्माण र विद्युत् उपकरण जडानको काम पूरा भएपछि परीक्षणका लागि राष्ट्रिय प्रसारण प्रणालीमा विद्युत् जोडिएको हो।

नेपाल विद्युत् प्राधिकरणको सहायक कम्पनी रघुगङ्गा हाइड्रोपावर लिमिटेड प्रवर्द्धक रहेको आयोजनाका प्रमुख राजबहादुर विष्टले परीक्षण उत्पादनका लागि आयोजनालाई राष्ट्रिय प्रणालीमा जोडिएको जानकारी दिए। उनका अनुसार २०–२० मेगावाट क्षमताका दुवै युनिट सञ्चालन गरेर परीक्षण भइरहेको छ।