कृष्णप्रसाद सिटौलाले भने– संकटका बेला पार्टीलाई एकताबद्ध बनाउन नेतृत्व किन हिचकिचाएको ?

काठमाडौँ । नेपाली कांग्रेसका नेता कृष्णप्रसाद सिटौलाले देश र लोकतन्त्र सङ्कटमा परेका बेला पार्टीभित्रको एकतालाई मजबुत बनाउन नेतृत्वसँग आग्रह गरेका छन् । बीपी स्मृति दिवसको कार्यक्रममा नेता सिटौलाले विशेष महाधिवेशनबाट आएको समूहले सबै पक्षलाई समेटेर अगाडि बढ्नुपर्नेमा जोड दिए ।

नेता सिटौलाले पार्टीभित्रको आन्तरिक असन्तुष्टि समाधानका लागि आफूहरूले राखेको माग निकै सामान्य रहेको बताए । ‘विशेष महाधिवेशन गरेर विघटन गरिएका साथीहरूलाई सँगै जोडिदिनुस् मात्र भनेका हौँ,’ उनले भने, ‘यति सानो माग पूरा गर्न नेतृत्व किन तयार भइरहेको छैन ? मुलुक र लोकतन्त्र सङ्कटमा परेको यो घडीमा पार्टीलाई एक बनाउन किन कन्जुस्याइँ गरिँदै छ ?’