राष्ट्रियता ०३३ सालभन्दा अहिले सयौँ गुणा धेरै खतरामा छ : पूर्णबहादुर खड्का

काठमाडौँ । नेपाली कांग्रेसका नेता पूर्णबहादुर खड्काले देशको राष्ट्रियता अहिले वि.सं. २०३३ सालको भन्दा सयौँ गुणा बढी खतरामा रहेको बताएका छन् । जननायक बीपी कोइरालाको ४४औँ स्मृति दिवसका अवसरमा आयोजित कार्यक्रममा बोल्दै उनले राष्ट्रियता, लोकतन्त्र र संविधान रक्षाका लागि कांग्रेसभित्रको एकता अपरिहार्य रहेकोमा जोड दिए ।

खड्काले बीपी कोइराला र गणेशमान सिंह २०३३ सालमा राष्ट्रिय मेलमिलापको नीति लिएर स्वदेश फर्कँदाको बखतको तुलनामा अहिलेको परिस्थिति झन् भयावह भएको विश्लेषण गरे । उनले भने, ‘बीपी र गणेशमानजी जुन बेला राष्ट्रियता खतरामा पर्‍यो भनेर नेपाल फर्कनुभएको थियो, अहिलेको अवस्था त्योभन्दा सयौँ गुणा बढी खराब छ । राष्ट्रियता अत्यन्त कमजोर अवस्थाबाट गुज्रिरहेको छ ।’