काठमाडौं रिङरोडमा महानगर यातायातका थप १६ विद्युतीय बस, एकपटकको चार्जमा २०० किलोमिटर गुड्ने

काठमाडौं । काठमाडौँ उपत्यकाको सार्वजनिक यातायातमा विद्युतीय सवारीको पहुँच बढाउँदै महानगर यातायात प्रालिले चक्रपथ क्षेत्रमा १६ वटा नयाँ विद्युतीय बस थपेको छ । यसअघि सोही क्षेत्रमा १२ वटा विद्युतीय बस सञ्चालन गर्दै आएको कम्पनीले बुधबारदेखि थप बसहरू सेवामा उतारेको हो ।

शशिला मोटर्स प्रालिमार्फत चीनबाट आयात गरिएका यी बसहरू महानगर यातायातले खरिद गरी सञ्चालनमा ल्याएको हो । ३३ सिट क्षमताका यी बसमा उभिएर यात्रा गर्ने यात्रुलाई समेत सहज हुने गरी डिजाइन गरिएको छ । जसले गर्दा एकै पटक ७० जनासम्म यात्रुले सहजै यात्रा गर्न सक्ने कम्पनीले जनाएको छ ।