अस्वाभाविक चलखेल

नेपाल धितोपत्र बोर्ड नाम गरेको एउटा निकायको प्रमुख नियुक्त हुनेबेला भएको रहेछ । यो एकदमै सामान्य र नियमित प्रक्रिया हो । यसभन्दा अघि पनि कैयनपटक यस संस्थाको प्रमुखको पद रिक्त भए र भरिए । निकै ठूलो हल्लीखल्ली भएन । नियुक्त हुन खोज्नेका लागि दौडधुपका हिसाबले सकस हुन्थ्यो होला । नियुक्ति दिनेका लागि पनि सकभर आफ्ना नजिकका मानिसलाई ल्याउने दबाब हुन्थ्यो होला । हामीकहाँ व्याप्त प्रचलनअनुसार रकम कलमको चलखेल पनि पक्कै हुन्थ्यो होला । समाचार प्रदायकका लागि एक कलमको सानो वा मझौला आकारको खबर बन्थ्यो । तर, आमचासोको विषय बन्नेगरी हल्लीखल्ली हुँदैनथ्यो ।

तर, यसपटक यो नियुक्ति निकै ठूलो खबरका रूपमा उजागर हुन खोज्दै छ । कोही ५ अर्बको कारोबारको कुरो गर्छन् कोही १० अर्बको ! एक सामान्य मानिसको दिमागले भेट्नै नसक्ने किस्सा कहानीले बजार गर्माएको छ, पत्याउनै मुस्किल ! त्यति सानो एउटा संस्थाको प्रमुख बन्न वा बनाउन मुलुकका सञ्चालक मरिहत्ते गरिलागेका छन् भनेर सुन्दा कसरी पत्याउने ! तर बिस्तारै छानिँदै बाहिर आएका खबरहरू सुन्दा एकथरीलाई कुनै विशेष व्यक्तिलाई त्यहाँको प्रमुख नबनाइ नहुने छ जस्तो बुझिन्छ भने अर्कोथरीलाई त्यो व्यक्तिलाई नरोकी नहुने जस्तो बुझिन्छ । सायद रोक्न खोज्नेको अरू कुनैलाई नबनाइ नहुने बाध्यता पनि होला ! यस रस्साकस्सीमा सरकारको स्थिरतामै प्रश्न उठ्न थालेको र गठबन्धन नै धरापमा पर्न लागेको सुन्दा कुरो निकै गम्भीर रहेछ भनेर नै बुझ्नुपर्ने हुन्छ । अनि लाग्छ साँच्चिकै अर्बौंको हिसाब किताब लुकेकै पो छ कि !