मेलम्ची भ्रष्टको दुहुनो गाई

पछिल्लो समयमा एकपछि अर्को गर्दै राष्ट्रघाती अपराध बढ्दै आएको छ । विगतमा व्यक्ति विशेषकै संलग्नतामा हुँदै आउने यो अपराध अहिले समूहगत हुन थालेको छ । संलग्नता पनि उच्चपदस्थ जिम्मेवार पदाधिकारीकै हुने क्रम पनि बढ्दो छ । यो अपराध संस्थागत रूपमै सुदृढ र विस्तारित भएको छ । तर, आश्चर्यलाग्दो कुरा यस्तै राष्ट्रघाती अपराधलाई प्रोत्साहित एवं संरक्षित गर्दै आउने राजनैतिक नेताहरू अझै पनि कारबाहीको दायरामा विरलै मात्र पर्दै छन् । राज्यकै व्यवहारले कानुनभन्दा माथिको बनाएका राजनैतिक व्यक्ति अधिकांश सुरक्षित रहन्छन् । राज्यको व्यवहार यस्तै भएसम्म ठूलो परिमाणका राष्ट्रघाती संगठित अपराध नियन्त्रण हुने सम्भावना पनि देखिँदैन ।

ललिता निवासको जग्गा हिनामिना प्रकरण र विमानस्थलको नक्कली भिसा प्रकरणपछि हालै सार्वजनिक भएको अर्को ठूलो राष्ट्रघाती अपराध मेलम्ची खानेपानी आयोजनामा भएको भ्रष्टाचार हो । स्मरण रहोस् मेलम्ची योजना निर्माणको क्रममा अहिलेसम्म विश्वबैंकको तर्फबाट २० अर्ब र नेपाल सरकारको तर्फबाट १० अर्ब गरी कुल ३० अर्ब रकम खर्च भइसकेको छ । अझै कति रकम लाग्छ त्यसको लागत अनुमान गर्न सक्ने अवस्था नै छैन । किनकि, हालसम्म निर्माण भइसकेकै अधिकांश संरचना अस्थायी र सिजनेवल अस्थाकै छन् । वर्षा प्रारम्भ भएसँगै मेलम्ची खोलामा आउने बाढीलाई थेग्ने क्षमता पनि निर्मित संरचनाको छैन ।