भूराजनीतिक स्वाधीनताको लागि सबल नेतृत्व छानौं

नेपालको सबैभन्दा ठूलो दुःख नै देशको भूराजनीतिक अवस्था हो । ठूला देशको बीचमा चेपिएको, भूराजनीतिक शक्तिहरुले सधैं आँखा लगाएका, भौगोलिक हिसाबले विश्व शक्ति केन्द्रहरुले आफ्नो प्रभाव जमाउन अनेक हथकण्डा गरिरहेको अवस्था आदिको कारणले नेपालको अहिलेको सबैभन्दा ठूलो चुनौती भनेको आफ्नो स्वाधीनतालाई विस्तार गर्नु र विश्व भूराजनीतिक टकरावलाई आफ्नो स्वार्थमा प्रयोग गर्न सक्ने कुटिलता प्रदर्शन गर्न सक्नु नै हो ।

शितयुद्धपछिको नेपालले नयाँ खालका भूराजनीतिक टकरावको सामना गर्दै आएको छ । चीन र पश्चिमाहरुको बढ्दो टकरावले नयाँ ढंगको शितयुद्ध सुरु भएको छ । भारतको बढ्दो शक्ति र उसको छिमेकीप्रतिको बढ्दो कठोर व्यवहारले नेपाललाई झनै ठूलो भूराजनीतिक कठिनाइ थपिएको छ । यी भूराजनीतिक कठिनाइहरु बढेर जाने निश्चित छ ।