फेरि विपत्तिको घण्टी

भदौ १० गतेको भोटेकोशी बाढीको विपत्ति सकिन नपाउँदै फेरि अर्को विपत्ति आउन सक्ने सम्भावनाको पूर्वानुमान गरिएको छ । पर्सि शुक्रबारदेखि चार दिनसम्म भारी वर्षाको गतिविधि बढ्ने सम्भावना मौसम पूर्वानुमान महाशाखाले गरेको छ । मौसमविद्हरुले यही असोज ९ गतेबाट मौसमी प्रणाली भित्रिने र ११ गते आइतबारसम्म नेपालका धेरै क्षेत्रमा वर्षा हुने अनुमान गरेका छन् । त्यसको असर आज बुधबारबाट देखिनेछ । नेपाल मौसम विज्ञान विभाग मौसम पूर्वानुमान महाशाखाले मौसम बुलेटिन जारी गरेको छ । सो अनुसार गण्डकी र लुम्बिनी प्रदेशका केही स्थानमा मेघ गर्जन, चट्याङ, हावाहुरीसहित भारी वर्षा हुने सम्भावना छ । यसले फेरि पश्चिम र सूदरपश्चिमको अवस्था झन् जटिल देखिएको छ । दशैँ आउनै लाग्दा देशभर विपत्तिको घण्टी बज्न थालेपछि सरकार पनि सचेत हुन थालेको छ ।

सरकारले विपद्जन्य घटनाबाट बच्न आपत्कालीन योजना शुरु गरेको छ । नेपालको लाइफलाइन ठानिएको पृथ्वी राजमार्जको पहिरोग्रस्त क्षेत्रमा प्लास्टिक लगाएर वर्षाको असर रोक्ने उपाय शुरु गरेको छ । यता सातै प्रदेश सरकारले मुख्य राजमार्गको सुरक्षा योजना तयार गरेका छन् । यात्रुलाई सहज यातायात व्यवस्था गर्न कार्ययोजना तयार गरेका छन् । वर्षा आउनु एक साताअघिबाट सरकारले भवितव्य हुनसक्ने चेतावनी दिएको छ । यो राम्रो काम हो ।