‘डार्क ट्रायड’ व्यक्तित्व भएका नेता रुचाउँछन् दक्षिणपन्थी दलका सदस्यहरू

व्यक्तिको व्यक्तित्व र उसले रोज्ने राजनीतिक दलबिच कस्तो सम्बन्ध हुन्छ ? यो एउटा रोचक प्रश्न हो । अहिले परिवर्तन भइरहेको बेलायती राजनीतिक परिदृश्यमा यसको अर्थ अझ चाखलाग्दो छ । उदाहरणका लागि, कुनै व्यक्ति कुनै राजनीतिक दलमा आबद्ध हुँदा उसले आफ्नै व्यक्तित्वका गुणहरू पार्टीको नेतामा पनि प्रतिबिम्बित भएको देख्न चाहन्छ, किन ?

व्यक्तित्वको प्रश्न त्यतिबेला अझ रोचक बन्छ, जब सकारात्मकभन्दा नकारात्मक व्यक्तित्वका गुणहरू हाबी भएको व्यक्तिको प्रसङ्ग आउँछ । यस्तो व्यक्तित्वलाई ‘डार्क ट्रायड’ भनिन्छ । यसमा नार्सिसिज्म (आत्ममुग्धता), म्याकियाभेलियनिज्म (कुटिल तथा स्वार्थकेन्द्रित व्यवहार) र साइकोप्याथी (असामाजिक तथा सहानुभूति–विहीन प्रवृत्ति) पर्छन् । यी तीन वटै अलग–अलग गुण भए पनि तिनमा आत्मकेन्द्रित तथा कुनै लक्ष्य हासिल गर्न झुट बोल्ने र छल गर्ने इच्छाजस्ता समान विशेषता पनि पाइन्छन् ।