एआईको बढ्दो मागसँगै भारतको सेमिकन्डक्टरमा १३.५ अर्ब डलरको नयाँ लगानी योजना

काठमाडौं । कृत्रिम बुद्धिमत्ता (एआई) प्रविधिको विस्तारसँगै विश्व बजारमा सेमिकन्डक्टर अर्थात् चिपको माग बढिरहेका बेला भारतले आफ्नो चिप उद्योगलाई विश्वव्यापी आपूर्ति शृंखलासँग जोड्ने गरी ठूलो लगानी योजना अघि सारेको छ ।

भारतले सेमिकन्डक्टर उत्पादनसँगै त्यसका लागि आवश्यक उपकरण, रसायन, सामग्री, ऊर्जा, पानी तथा दक्ष जनशक्तिसहितको समग्र औद्योगिक पूर्वाधार विकासमा जोड दिएको हो । यसका लागि सन् २०२१ मा सुरु गरिएको सेमिकन्डक्टर मिसनको दोस्रो चरणमा १३ अर्ब ५० करोड अमेरिकी डलर लगानी गर्ने योजना स्वीकृत गरिएको छ ।