भन्सार अधिकृतले सशस्त्रका एसपीलाई थर्काएको अडियो यत्रतत्र, भएको के हो ?

काठमाडौं । भन्सार प्रक्रिया पूरा गरेर आएको भारतीय गाडी कैलालीमा नियन्त्रणमा लिएको विषयमा कञ्चनपुर भन्सार कार्यालय गड्डाचौकीका भन्सार अधिकृत चक्रदेव भट्ट र सशस्त्र प्रहरीबीच विवाद भएको छ। विवादका क्रममा भट्टले सशस्त्र प्रहरी बल नेपाल नम्बर ३४ गण कैलालीका प्रमुख प्रहरी उपरीक्षक(एसपी) खुमबहादुर केसीलाई फोनमार्फत थर्काएको अडियो सार्वजनिक भएको हो।

सामाजिक सञ्जालमा सार्वजनिक भएको टेलिफोन संवादमा भट्टले गड्डाचौकी भन्सारबाट प्रक्रिया पूरा गरी पास भइसकेको गाडी कैलालीमा किन नियन्त्रणमा लिइएको भन्दै केसीसँग प्रश्न गरेका छन्। उनले गाडी तत्काल छाड्न वा भन्सार कार्यालयमा पठाउन आग्रह गर्दै गाडी नछाडिए गृहमन्त्री, प्रहरी महानिरीक्षक र भन्सार विभागका प्रमुखलाई जानकारी गराउने चेतावनी दिएका छन्।