कांग्रेसको १५औँ महाधिवेशन : ५८ जिल्लाका ५१२ पालिकामा अधिवेशन सुरु

काठमाडौँ । नेपाली कांग्रेसको १५औँ महाधिवेशनको प्रक्रियाअन्तर्गत अहिले देशभरका विभिन्न जिल्लामा पालिकास्तरीय अधिवेशनहरू सुरु भएका छन् । केन्द्रीय निर्वाचन समितिका सदस्यसचिव राजु कटुवालका अनुसार हालसम्म ५८ जिल्लाका ५१२ वटा पालिकामा अधिवेशनको प्रक्रिया अघि बढेको छ।

सदस्यसचिव कटुवालले वडा अधिवेशनको तुलनामा पालिका अधिवेशन केही जटिल र समय लाग्ने खालको भएको बताए । उनले रातोपाटीसँग भने– ‘वडा अधिवेशन जस्तो सजिलो पालिका अधिवेशन हुँदैन। यहाँ सर्वसम्मतिको सम्भावना पनि कम छ, यदि सर्वसम्मतिको प्रयास गरिए पनि सबै पक्ष मिलाउन समय लाग्छ।’