अफगान-पाक सीमामा फेरि तनाव

इस्लामावाद- पाकिस्तानका स्थानीय अधिकारीहरूले अफगानिस्तानको सेनाले रातभर पाकिस्तानी सीमा चौकीमा मोर्टार तथा अन्य भारी हतियारबाट गोलाबारी गरेको बताएका छन् । अफगानिस्तानले भने आफ्ना सुरक्षाकर्मीले त्यस्तो कुनै आक्रमण नगरेको दाबी गरेको छ । पाकिस्तानी अधिकारीहरूका अनुसार पाकिस्तानी सेनाले आतङ्कवादी समूहको सीमापार घुसपैठ प्रयास विफल पारेपछि अफगान तालिबान सेनाले सीमा चौकीलाई लक्षित गरी गोलाबारी गरेको हो ।

पाकिस्तानी सेनाले जवाफी कारबाहीमा अफगानिस्तानमा शासन चलाइरहेको तालिबानको सेनाका सीमा चौकी, मोर्टार प्रहार गर्ने स्थान र अन्य रक्षात्मक संरचनालाई तोपखानाबाट निशाना बनाएको दाबी गरेको छ । चार जना स्थानीय अधिकारीका अनुसार पक्टिया र नङ्गरहार प्रान्तमा अफगान सीमाबाट आतङ्कवादीहरूले पाकिस्तान प्रवेश गर्ने प्रयास गरेका थिए । पाकिस्तानले पाकिस्तानी तालिबानका लागि प्रयोग गर्ने ‘फितना–उल–खवारीज’ नामले उनीहरूलाई सम्बोधन गर्दै आएको छ ।