ओलीलाई सम्मानजनक बिदा लिन योगेश भट्टराईको प्रस्ताव, ७ बुँदामा उठाए गम्भीर प्रश्न

नेकपा (एमाले)का उपमहासचिव योगेश भट्टराईले अध्यक्ष केपी शर्मा ओलीले नेतृत्वबाट सम्मानजनक रूपमा बिदा लिएर नयाँ नेतृत्वका लागि मार्गप्रशस्त गर्नुपर्ने प्रस्तावसहित लिखित धारणा पार्टी नेतृत्वसमक्ष राखेका छन्। भट्टराईले मंगलबार केन्द्रीय कमिटी बैठकमा बोल्ने समय नपाएपछि अध्यक्ष ओलीलाई लिखित दस्तावेज बुझाएका थिए।

भट्टराईले पार्टीमा नेतृत्व हस्तान्तरणलाई कुनै व्यक्तिलाई हटाउने वा पद खोस्ने विषयका रूपमा नभई लोकतान्त्रिक संस्कार, पुस्तान्तरण, वैचारिक पुनर्जागरण र नयाँ राजनीतिक विश्वास निर्माणसँग जोडिएको विषयका रूपमा व्याख्या गरेका छन्। उनले निर्वाचन समीक्षा प्रतिवेदन, पार्टीभित्रका विभिन्न समीक्षा तथा आमकार्यकर्ता र जनताको भावनालाई समेत आत्मसात् गर्दै ओलीले नयाँ नेतृत्वका लागि बाटो खोल्नुपर्ने उल्लेख गरेका छन्।