विपन्नलाई बिजुली

यतिबेला नेपाली जनता शासनसत्ता सञ्चालन गर्ने ठाउँमा बसेकासँग सन्तुष्ट छैनन्। एकातिर आमसर्वसाधारणको महत्त्वाकांक्षा चुलिँदो छ भने अर्कोतर्फ सरकारका सीमितता आफ्नै ठाउँमा छन्। भएकै स्रोत र अधिकारलाई समेत राम्ररी परिचालन गर्न नसकेका कारण आमजनताको सेवा पाउने अधिकारसमेत कुन्ठित भइरहेको छ। अर्कोतर्फ सरकार सञ्चालकहरूका स्वार्थले पनि जनताको निराशामा चर्को घिउ थप्ने कार्य भएका छन्।

यस्तो अवस्थामा भर्खरै सरकारले गरिब जनतालाई बिजुलीमा ५० प्रतिशत छूट दिने निर्णय गरेको छ। जसअनुसार ३० युनिटसम्म विद्युत् उपयोग गर्ने उपभोक्ताले विद्युत् शुल्कको आधा मात्र तिरे पुग्छ। ३० युनिटसम्म मात्र विद्युत् उपयोग गर्नेहरू नेपालको सन्दर्भमा विपन्नमा पर्छन्। यसरी हेर्दा सरकारले अहिले गरेको निर्णयले विपन्न समुदाय लाभान्वित हुनेमा शंका छैन।