हलेसी तुवाचुङमा भूमि प्रशासन सेवा सुरु

खोटाङ । खोटाङको हलेसी तुवाचुङ नगरपालिकाले स्थानीय तहबाटै भूमि तथा मालपोतसम्बन्धी सेवा प्रदान गर्न भूमि प्रशासन सेवा सुरु गरेको छ । एघार वडा रहेको जिल्लाको दोस्रो ठूलो स्थानीय तहले असोज–५ गतेदेखि उक्त सेवा सञ्चालनमा ल्याएपछि सामान्य प्रकृतिका भूमि तथा मालपोतसम्बन्धी कामका लागि सदरमुकाम दिक्तेल पुग्नुपर्ने सेवाग्राहीको बाध्यता हटेको नगरपालिकाले जनाएको छ ।

नगरप्रमुख विमला राईका अनुसार भूमि प्रशासन तथा नापी कार्यालयबाट प्रवाह हुने सेवामध्ये बायोमेट्रिक बाहेक अन्य सबै सेवा अब स्थानीय तहबाटै उपलब्ध हुनेछन् । जिल्लाका दश स्थानीय तहमध्ये यसरी भूमि प्रशासन तथा नापी सेवा सुरु गर्ने हलेसी तुवाचुङ पहिलो स्थानीय तह बनेको छ ।