अन्तरिम विधानमै खनालको असहमति, महाधिवेशनदेखि नयाँ संरचनासम्मका प्रस्ताव

नेपाली कम्युनिष्ट पार्टीका वरिष्ठ नेता झलनाथ खनालले पार्टीले जारी गरेको ‘अन्तरिम विधान २०८२’ प्रति कडा असहमति जनाउँदै त्यसको आधारमा अघि बढ्दा पार्टी कम्युनिष्ट नभई ‘यथास्थितिवादी लोकतान्त्रिक समाजवादी’ दिशातर्फ जाने दाबी गरेका छन्। उनले वर्तमान अन्तरिम विधानका आधारमा राष्ट्रिय महाधिवेशनमा जान नसकिने भन्दै विधानका केही प्रावधान खारेज गरेर नयाँ आधारमा पार्टी निर्माण गर्नुपर्ने प्रस्ताव अघि सारेका छन्।

केन्द्रीय संयोजन समितिको पहिलो बैठकमा राखेको प्रस्तावमा खनालले पार्टी पुनर्गठन र पुनर्निर्माणका लागि राष्ट्रिय महाधिवेशनमा जानुको विकल्प नरहेको बताएका छन्। उनका अनुसार मुलुकको राजनीतिक शक्ति सन्तुलनमा ठूलो परिवर्तन आइसकेकाले पार्टीले पनि नयाँ कार्यदिशा, नीति र सिद्धान्तका आधारमा आफूलाई पुनर्संरचना गर्नुपर्ने अवस्था आएको छ।