म्याग्दीबाट कुष्ठरोग उन्मूलन

म्याग्दी । म्याग्दीबाट कुष्ठरोग उन्मूलन भएको जनाइएको छ । ७३औँ विश्व कुष्ठरोग दिवसका अवसरमा आइतबार प्रदेश जनस्वास्थ्य कार्यालयले बेनीमा आयोजना गरेको कार्यक्रममा कुष्ठरोग उन्मूलन भएको जानकारी गराइएको हो ।

कार्यालयका प्रमुख भुवन ठकुराठीका अनुसार प्रति दश हजार जनसङ्ख्यामा एक जनाभन्दा कम कुष्ठरोगी भएमा उन्मूलन भएको मानिन्छ । “एक लाख जनसङ्ख्या भएको म्याग्दीमा पछिल्लो पाँच वर्षयता प्रति दश हजार बराबर एक जनाभन्दा कम कुष्ठरोगी पहिचान भएको आधारमा उन्मूलन भएको मानिएको हो,” उनले भने, “रोगी पहिचान गरी उपचारको दायरामा ल्याउनुका साथै भेदभाव र लाञ्छना विरुद्ध सचेतनामूलक कार्यक्रमलाई निरन्तरता दिएका छौँ ।”