विदेशी कालिगढ विस्थापन गर्न सुनचाँदी क्षेत्रमा तालिम आवश्यकः कोषाध्यक्ष लकान्द्री

काठमाडौं– नेपालमा सुनचाँदी तथा रत्न–आभूषण क्षेत्रमा ठूलो संख्यामा विदेशी कालिगढ कार्यरत रहेको र यसबाट वार्षिक रूपमा अर्बौं रुपैयाँ विदेशिने भएकाले सरकारले स्वदेशमै दक्ष जनशक्ति उत्पादनमा जोड दिन नेपाल सुनचाँदी रत्न तथा आभूषण महासंघका कोषाध्यक्ष गणेशप्रसाद लकान्द्रीले माग गरेका छन् । कोषाध्यक्ष लकान्द्रीले सरकारले महासंघसँग सहकार्य गरेर प्रत्येक प्रदेशमा तालिम केन्द्र स्थापना गरे २० देखि ३० हजार नेपाली युवाले प्रत्यक्ष रोजगारीको अवसर प्राप्त गर्न सक्ने बताएका छन् ।

उनका अनुसार, सुनचाँदी व्यवसाय नेपालको परम्परागत तथा सम्भावना बोकेको क्षेत्र भए पनि दक्ष जनशक्ति अभावका कारण व्यवसायी विदेशी कालिगढमा निर्भर हुन बाध्य छन् । यसको प्रत्यक्ष असर मुलुकको अर्थतन्त्रमा परेको भन्दै उनले विदेशी कामदारलाई पारिश्रमिकका रूपमा अर्बौं रुपैयाँ बाहिरिने अवस्था अन्त्य गर्न सरकार गम्भीर हुनुपर्ने बताए ।