इरानमा हमास नेता हानिया मारिएपछि मध्यपूर्व तरंगित

काठमाडौँ — प्यालेस्टिनी पूर्वप्रधानमन्त्री तथा हमास नेता इस्माइल हानिया इरानी राजधानी तेहरानमा मारिएका छन् । उनी ६२ वर्षका थिए । प्यालेस्टिनी विद्रोही समूह हमासले आफ्ना प्रमुख नेता हानिया तेहरानको एक आक्रमणमा मारिएको पुष्टि गरेको छ । आक्रमणमा हानियाका एक अंगरक्षक पनि मारिएको इरानको रेभलुस्नरी गार्ड कोर्प्सले जनाएको छ ।

हमासका अनुसार हानिया इरानका नवनिर्वाचित राष्ट्रपति मसुद पेजेस्कियानको शपथग्रहण समारोहमा सहभागी हुन इरान गएका थिए । उक्त समारोह मंगलबार भएको थियो । हानियाले मंगलबार नै इरानी सर्वोच्च नेता खामनेई र राष्ट्रपति पेजेस्कियानसँग भेटवार्ता गरेका थिए । त्यस्तै उनले तेहरानस्थित संसद् भवनको भ्रमणका क्रममा विभिन्न सांसदहरूलाई पनि भेटेका थिए ।