विद्युत् नियमन आयोगले पायो नयाँ नेतृत्व, अध्यक्ष धितालको पहिलो निर्णय– संस्थागत र नियामकीय सुधारमा जोड

विद्युत् नियमन आयोगले नयाँ नेतृत्व पाएको छ। नवनियुक्त अध्यक्ष डा. रामप्रसाद धिताल तथा सदस्यहरू बलराम सिलवाल, लोकराज पाठक र जयराज भण्डारीले बिहीबार पद तथा गोपनीयताको शपथ ग्रहणसँगै औपचारिक रूपमा कार्यभार सम्हालेका छन्।

ऊर्जा, जलस्रोत तथा सिँचाइ मन्त्री विराजभक्त श्रेष्ठले मन्त्रालयमा आयोजित कार्यक्रममा आयोगका पदाधिकारीलाई शपथ गराउँदै ऊर्जा क्षेत्रको नियमनलाई अझ प्रभावकारी, पारदर्शी र नतिजामुखी बनाउन निर्देशन दिएका हुन्। उनले आयोगमा अनुभव सम्पन्न नेतृत्व आएको उल्लेख गर्दै नीतिगत सुधार, संस्थागत सुदृढीकरण तथा नियामकीय संरचनाको विकासमा विशेष ध्यान दिन आग्रह गरे। मन्त्रालयले आयोगलाई आवश्यक नीतिगत तथा प्रशासनिक सहयोग उपलब्ध गराउने प्रतिबद्धता पनि उनले व्यक्त गरे।