वन्डर्स इनर्जीको साधारणसभा: खिम्ती ध्वाँङ् आयोजना २०८४ चैतभित्र सक्ने लक्ष्य, ३० करोडको आईपीओ ल्याउने

काठमाडौं । वन्डर्स इनर्जीको वार्षिक साधारणसभा सम्पन्न भएको छ । कम्पनीले प्रवर्द्धन गरिरहेको ९ मेगावाट क्षमताको ‘खिम्ती ध्वाँङ् साना जलविद्युत आयोजना’ को प्रगति र आगामी योजनाबारे साधारणसभामा विस्तृत छलफल गरिएको छ ।

साधारणसभालाई सम्बोधन गर्दै कम्पनीका कार्यकारी सञ्चालक प्रकाश दुलालले आयोजनाको निर्माण कार्य तीब्र गतिमा अगाडि बढिरहेको र २०८४ साल चैतभित्र निर्माण सम्पन्न गर्ने लक्ष्य राखिएको जानकारी दिए । उनका अनुसार आयोजनाका लागि अत्यावश्यक सरकारी जग्गा प्राप्ति र रुख कटानको अनुमति गत वैशाख १५ गतेको मन्त्रिपरिषद् बैठकबाट निर्णय भइसकेको छ, जसले आयोजना निर्माणको बाटो थप सहज बनाएको छ ।