क्यान्सर उपचार सेवा जोखिममा नपरोस्

देशकै ठूलो र जेठो सरकारी अस्पताल वीर अस्पतालमा क्यान्सरका बिरामीका लागि सञ्चालनमा रहेको अत्याधुनिक टोमोथेरापी सेवा कुनै पनि बेला अवरुद्ध हुनसक्ने अवस्था सिर्जना हुनु जनस्वास्थ्यका सवालमा गम्भीर चिन्ताको विषय हो । नागरिकको जीवनसँग प्रत्यक्ष जोडिएको यस्तो संवेदनशील उपचार प्रणाली आर्थिक तथा प्रशासनिक विवादका कारण जोखिममा पर्नु सामान्य होइन । टोमोथेरापी क्यान्सर उपचारमा प्रयोग हुने अत्याधुनिक रेडियोथेरापी प्रविधि हो । क्यान्सरग्रस्त कोषलाई लक्षित गरी रेडिएसन दिने भएकाले जटिल क्यान्सर उपचारमा यसको महत्वपूर्ण भूमिका रहन्छ । वीर अस्पतालमा उपलब्ध यो प्रविधि आर्थिक अवस्था कमजोर भएका नागरिकका लागि समेत महत्वपूर्ण उपचारको आधार हो । त्यसैले यसको निरन्तर सञ्चालन सुनिश्चित गर्नु राज्यको प्राथमिक दायित्व हुनुपर्छ ।

आपूर्तिकर्ता कम्पनी लाइफलाइन ट्रेड इन्टरनेसनल प्रालिले वीर अस्पतालबाट टोमोथेरापी मेसिनको करिब ३० प्रतिशत अर्थात् करिब २० करोड रुपैयाँ भुक्तानी हुन बाँकी रहेको दाबी गर्दै स्वास्थ्य तथा खाद्य स्वच्छता मन्त्रालयमा पत्र पठाएको विषय सार्वजनिक भएको छ । कम्पनीले भुक्तानी नहुँदा आफू आर्थिक संकटमा परेको र मुख्य उत्पादक कम्पनीलाई रकम भुक्तानी गर्न नसक्दा प्रणालीको प्राविधिक सपोर्टसमेत प्रभावित भएको जनाएको छ । कुनै प्राविधिक खराबी वा ब्रेकडाउन भए त्यसबाट हुने सेवा अवरोध र खर्चको जिम्मेवारी लिन नसक्ने चेतावनीसमेत कम्पनीले दिएको छ ।