भेप प्रतिबन्ध र सुर्तीमा कर वृद्धि नगर्दा नेपालको बेइज्जत

काठमाडौं । सुर्तीजन्य पदार्थ नियमन तथा नियन्त्रण ऐन र सुर्तीसम्बन्धी अन्तर्राष्ट्रिय अभिसन्धि (एफसीटीसी)लाई कार्यान्वयन गर्न तदारुकता नदेखाइँदा अन्तर्राष्ट्रिय फोरममा अप्ठेरो भोगिरहेको नेपालले इलेक्ट्रोनिक सिगरेटलाई प्रतिबन्ध गर्ने घोषणा गरी कार्यान्वयन नगर्दा अर्को बेइज्जती भोगिरहेको छ ।

सुर्तीजन्य पदार्थ नियमन तथा नियन्त्रण ऐन, २०६८ ले सार्वजनिक स्थलमा धुमपान गर्नेमाथि कारबाही गर्ने भने तापनि कारबाही गरेको तथ्यांक नदेखिएकाले र सुर्तीमा कर बढाउने प्रतिबद्धतासहितको एफसीटीसीमा हस्ताक्षर मात्र गरी कर वृद्धि नगरेकाले अन्तर्राष्ट्रिय फोरममा लाज हुने गरेको स्वास्थ्य अधिकार तथा सुर्ती नियन्त्रण सञ्जाल, नेपालका अध्यक्ष शान्तलाल मुल्मीले बताए । विश्व स्वास्थ्य संगठनले सुर्तीमा कम्तीमा ७५ प्रतिशत कर लगाउनुपर्ने भने तापनि नेपालमा ३३ प्रतिशतको हाराहारीमा मात्र कर रहेको छ ।