लोकसभा निर्वाचन र मोदी सरकार

दक्षिणी छिमेकी भारतको १८औं लोकसभाका लागि विभिन्न सात चरणमा निर्वाचन भइरहेको छ । अहिलेसम्म चार चरणमा निर्वाचन भइसकेको अवस्था छ । मत परिणाम २२ जेठमा सार्वजनिक हुनेछ । अधिकांश चुनावी विश्लेषकहरू र सञ्चारमाध्यमले निर्वाचनअघि गराएको सर्वेक्षणमा प्रधानमन्त्री नरेन्द्र मोदी नेतृत्वको भारतीय जनता पार्टीले आफ्ना सहयोगी दलहरूसहित सजिलै बहुमत हासिल गरी अर्को ५ वर्ष सरकार चलाउने आँकलन गरेका छन् । स्वतन्त्र भारतका प्रथम प्रधानमन्त्री पण्डित जवाहरलाल नेहरूपछि लगातार तेस्रोपटक प्रधानमन्त्री बन्ने दिशामा अग्रसर मोदी आफ्नो आकर्षक, ओजस्वी एवं प्रभावकारी भाषणका कारण पनि निकै लोकप्रिय मानिन्छन् । विगत १० वर्षदेखि सत्तामा रहेर पनि आफ्नो लोकप्रियतालाई यथास्थितिमै कायम राख्नु सामान्य सफलता होइन । मोदीको लोकप्रियता कायम हुनुमा उनको सरकारद्वारा गरिबवर्ग, महिला, किसान एवं युवाहरूको हितमा चालिएका लोककल्याणकारी योजनाहरू तथा आन्तरिक एवं बाह्य सुरक्षाका क्षेत्रमा सरकारको कठोर एवं प्रभावकारी नीतिलाई पनि कारण मानिन्छ ।

सन् २०१९ मा भएको लोकसभा निर्वाचनमा भारतीय जनता पार्टीले ३७ दशमलव ७ प्रतिशत मतसहित ३ सय ३ सिट जितेको थियो, जबकि सन् २०१४ मा यसले ३१ दशमलव ३ प्रतिशत मतसहित २ सय ८२ सिट जितेको थियो । ५ वर्षसम्म सरकारको नेतृत्व गरेर पनि मोदी नेतृत्वको भारतीय जनता पार्टीले ६ प्रतिशतभन्दा बढी मत र २१ सिट बढी जित्नु सामान्य उपलब्धि होइन । जारी निर्वाचनका लागि पार्टीले आफ्ना लागि एक्लै ३ सय ७० र गठबन्धनका सहयोगी दलहरूसहित ४ सय सिट हासिल गर्ने लक्ष्य राखेको र मत प्रतिशत पनि ५१ प्रतिशत हासिल गर्ने लक्ष्य राखेको मोदीको दाबी छ । ४ सय सिटको संख्या कतिपय विश्लेषकहरूलाई सुरुमा असम्भवजस्तो लागेको थियो, तर पश्चिम बंगाल तथा दक्षिणका प्रान्तहरू तामिलनाडू, केरल र आन्ध्रप्रदेशतिर पार्टीको सिट संख्या बढ्ने सम्भावना देखिन्छ । राजनीतिमा लक्ष्य भने ठूलो नै राख्नुपर्छ, फेरि भारतीय जनता पार्टीजस्तो अनुशासित, विशाल संगठन भएको र राष्ट्रिय स्वयंसेवक संघको संरक्षण प्राप्त पार्टीका लागि यस्तो लक्ष्य निर्धारण हुनु अस्वाभाविक पनि होइन ।