लाखौँ रुपैयाँमा किनबेच हुन लागेको ‘टल्कने’ ढुङ्गा प्रहरीले बरामद गर्याे

गाेरखा – गोरखा नगरपालिका–७ सतिपिपलबाट टल्कने ढुङ्गा प्रहरीले बरामद गरेको छ । लाखौँ रुपैयाँमा खरिद बिक्रीका लागि मोलमोलाइ भइरहेको भन्ने सूचनाका आधारमा ढुङ्गा राखिएको घरमा बिहीवार बिहान छापा मारेर बरामद गरिएको गाेरखाका प्रहरी उपरीक्षक (एसपी) अनुपम श्रेष्ठले बताउनुभयो । सतिपिपलका एक व्यक्तिले घरको पूजाकोठामा राखेको ५४ केजी तौलको टल्कने ढुङ्गा बरामद गरिएको उहाँले जानकारी दिनुभयो ।

‘ढुङ्गा पारदर्शी छ, बत्ती बाल्दा टल्किन्छ, अँध्यारोमा पनि चमकदार देखिन्छ भन्ने सूचना पाएका थियौँ’, एसपी श्रेष्ठले भन्नुभयो, ‘मोलमोलाइका लागि बाहिरबाट मान्छेहरू आउने जाने क्रम बढेपछि हामीले बरामद गरेका हौँ ।’ घरधनीले पुस्तौँदेखि आफ्नो घरमा याे ढुङ्गा रहेको बताएका छन् ।