जीडीपीमा उत्पादन क्षेत्रको योगदान १५% पुर्‍याइने

काठमाडौं । २०७९ देखि २०८९ सालसम्म सञ्चालन हुने ‘प्रधानमन्त्री नेपाली उत्पादन एवं उपभोग अभिवृद्धि कार्यक्रम’को अवधारणापत्र तयार भएको छ । कुल गार्हस्थ्य उत्पादन (जीडीपी)मा उत्पादनमूलक क्षेत्रको योगदान घट्दो अवस्थामा रहेका बेला त्यसलाई १० वर्षमा १५ प्रतिशतसम्म पुर्‍याउने लक्ष्यसहित अवधारणापत्र बनाइएको हो ।

अहिले जीडीपीमा उत्पादनमूलक क्षेत्रको योगदान ५ दशमलव ९ प्रतिशत छ । आठौं योजनामा यो क्षेत्रको योगदान १२ दशमलव ७ प्रतिशत थियो । यसले क्रमिक रूपमा उत्पादनमूलक क्षेत्रको योगदान घटिरहेको देखाउँछ । चालू आर्थिक वर्ष २०७९/८० को बजेट वक्तव्यमा स्वदेशी उत्पादन एवं उपभोग अभिवृद्धि कार्यक्रमका लागि ३ अर्ब ४५ करोड रुपैयाँ विनियोजन गरिएको छ । नेपाली उत्पादनको वृद्धि, रोजगारी सृजना र निर्यातलक्षित व्यापार अभिवृद्धिका लागि शुरू गरिएको उक्त कार्यक्रम कार्यान्वयन गर्न उद्योग, वाणिज्य तथा आपूर्ति मन्त्रालयले अवधारणापत्र तयार गरेको हो ।