विद्यार्थीको प्रश्न– कानुन बनाउने सांसद नै किन कुर्सी फुटाउँछन् ?

विराटनगर । संसदीय पारदर्शीता, कानुन निर्माण प्रक्रियाको परिपक्वता, शक्ति पृथकीकरण र कानुन कार्यान्वयनको फितलो अवस्थाबारे विराटनगरमा विद्यार्थीमाझ बहस भएको छ। सो क्रममा उपस्थित कानुनका विद्यार्थीहरूले संसदीय प्रणालीका छिद्र, सांसदहरूको गैरजिम्मेवार व्यवहार, नीतिगत अपरिपक्वता र कानुन कार्यान्वयनको फितलोपनमाथि निकै कडा प्रश्न गरे।

‘हालै शिक्षा र स्वास्थ्यजस्ता अति संवेदनशील र नागरिकको मौलिक अधिकारसँग जोडिएका क्षेत्रमा हतार–हतार कर बढाउने कानुन पारित गरियो, तर जब सडकमा व्यापक जनविरोध र आन्दोलन भयो, तब सरकार र संसदले पुनः त्यो निर्णय फिर्ता लियो,’ विद्यार्थी प्रतिभा पोखरेलले भनिन्, ‘निर्णय गर्नुअघि पर्याप्त अनुसन्धान र सरोकारवालासँग छलफल किन गरिँदैन ? के जनता सडकमा ओर्लेर आन्दोलन गरेपछि मात्रै संसदको आँखा खुल्ने हो ? यसले हाम्रा नीति निर्माताहरूको अपरिपक्वता र लाचारपन उदाङ्गो पारेको छैन र ?’