स्क्रिनसटले बदल्दै एआईको काम गर्ने तरिका, प्रयोगकर्ताको डाटा कत्तिको सुरक्षित ?

काठमाडौं । तपाईंको स्मार्टफोनमा जस्तै ल्यापटप वा डेस्कटपमा पनि धेरै स्क्रिनसटहरू सुरक्षित भएका हुन्छन् । सामाजिक सञ्जालका पोस्ट, मनपर्ने परिकारका विधि, किनमेल गर्न चाहेका लुगा जुत्ता वा महत्त्वपूर्ण जानकारीका स्क्रिनसट प्राय: सबैले खिच्ने गर्छन् । तस्बिर खिच्ने बेला ती उपयोगी लागेपनि केही समयपछि धेरैजसो प्रयोगकर्ताले तिनलाई बिर्सिन्छन् ।

तर तपाईंले बिर्सिसकेका यिनै स्क्रिनसटहरू अहिले कृत्रिम बौद्धिकता (एआई) का लागि महत्त्वपूर्ण स्रोत बन्दै गएका छन् । एआई मोडेलहरूले स्क्रिनसटलाई सामान्य तस्बिरका रूपमा मात्र नभई त्यसभित्र रहेका पाठ, बटन, मेनु, मूल्य, मिति, स्थान र अन्य जानकारी बुझ्न सकिने डिजिटल सामग्रीका रूपमा विश्लेषण गर्न सक्छन् ।