बीरगञ्जको नारायणी अस्पतालमा बिरामीको मृत्युपछि चिकित्सकमाथि साघातिक आक्रमण, चिकित्सक संघको विरोध

बीरगञ्ज — नारायणी अस्पतालमा उपचारका क्रममा एक बिरामीको निधन भएपछि आक्रोशित भीडले आकस्मिक कक्षमा तोडफोड गर्नुका साथै चिकित्सकमाथि ज्यानै लिने उद्देश्यले साघातिक आक्रमण गरेको घटनाले समग्र स्वास्थ्य क्षेत्रमा त्रास फैलाएको छ। घटनामा गम्भीर घाइते भएका मेडिकल अफिसर डा. प्रमोद रामको सोही अस्पतालको सघन उपचार कक्ष (आईसीयू) मा उपचार भइरहेको छ।

नेपाल चिकित्सक संघ (एनएमए) नारायणी शाखाले शनिबार विज्ञप्ति जारी गर्दै उक्त जघन्य तथा अमानवीय घटनाको घोर भर्त्सना गरेको छ। संघका अनुसार शनिबार बिहान करिब ११ बजे वीरगञ्ज महानगरपालिका–२५ निवासी ४५ वर्षीय राजकुमार पटेललाई मुटुसम्बन्धी गम्भीर समस्याका कारण अस्पतालको आकस्मिक कक्षमा उपचारका लागि ल्याइएको थियो। चिकित्सकहरूको टोलीले तत्काल आवश्यक उपचार उपलब्ध गराउँदा–गराउँदै पनि बिरामीको कार्डिएक अरेस्टका कारण दुःखद निधन भएको थियो।