भारत भ्रमणपछि रवि लामिछाने थप शक्तिशाली बन्दैछन् ?

काठमाडौँ । राष्ट्रिय स्वतन्त्र पार्टी(रास्वपा) का सभापति रवि लामिछानेलाई भारतले उच्च महत्त्व दिएको विषयलाई कूटनीतिक क्षेत्रमा अर्थपूर्ण रूपमा हेरिएको छ । भारतको सत्तारुढ दल भारतीय जनता पार्टी (भाजपा)का अध्यक्ष नितिन नवीनको निमन्त्रणमा जेठ १८ गते नयाँदिल्ली पुगेको रवि नेतृत्वको प्रतिनिधिमण्डललाई त्यहाँका प्रधानमन्त्री नरेन्द्र मोदी, गृहमन्त्री अमित शाह, विदेशमन्त्री डा. एस. जयशंकर लगायत उच्चस्तरीय पदाधिकारीले भेटवार्ता गरेका थिए ।

०७९ मा आफ्नै नेतृत्वमा राष्ट्रिय स्वतन्त्र पार्टी गठन गरेका रविले केही महिनामै भएको संसदीय निर्वाचनमा उत्साहप्रद परिणाम निकाल्दै संसदीय राजनीतिमा आफ्नो पार्टीलाई निर्णायक शक्तिका रूपमा स्थापित गरे । त्यस यता उनले विभिन्न खण्डमा आरोह–अवरोध सामना गरे । शक्तिशाली मन्त्रालय लिएर सत्तामा पुगेका उनी लामो समय टिक्न सकेनन् । नागरिकता प्रकरणमा उनको सांसद पद समेत गुम्यो ।