बेलायतमा रविको चार दिन, गोर्खा मुद्दा र विद्यार्थीका समस्यालाई प्राथमिकता

लन्डन। चार दिने बेलायत भ्रमणका क्रममा राष्ट्रिय स्वतन्त्र पार्टी (रास्वपा) सभापति रवि लामिछाने जनसमर्थन जुटाउन व्यस्त रहे । आफ्नो पार्टीको मिसन ८४ प्रस्ट्याउन तल्लीन उनले बेलायतमा भूतपूर्व गोर्खा र विद्यार्थीका माग सम्बोधन गर्न पनि चासो व्यक्त गरे ।

नेपाली उल्लेख्य बसोबास रहेको अल्डरसटस्थित एम्पाएर हलमा आयोजित एक अन्तरक्रिया कार्यक्रमलाई सम्बोधन गर्दै लामिछानेले देश विकासमा विदेश बस्ने नेपालीहरूको ठुलो भूमिका रहेको भन्दै ‘एक पटकको नेपाली संधैको नेपाली’ भन्ने आफ्नो पार्टीको धारणा रहेको बताए। यसलाई सार्थकता दिन अन्य पार्टीबाट सम्भव नभएकाले एक पटक आफ्नो पार्टीलाई देश बनाउने जिम्मा दिन पहल गर्न उनले आग्रह गरे । एक घण्टा भन्दा बढी लामो भाषणमा उनले देशमा व्याप्त बेथिति र भ्रष्टाचारबारे समय खर्चेका थिए ।