स्याउका चानाबाट जुम्लाका किसानको बढ्यो आम्दानी: व्यवसाय विस्तार गर्दै किसान

जुम्लामा स्याउ उत्पादनलाई प्रशोधनसँग जोड्ने अभ्यास बढ्दै जाँदा किसानको आम्दानीमा उल्लेख्य वृद्धि हुन थालेको छ। काँचो स्याउ बेचेर सीमित आम्दानी गर्ने अवस्थाबाट बाहिर निस्कँदै किसानहरू अहिले स्याउका चाना उत्पादनमार्फत मूल्य अभिवृद्धि गर्दै व्यवसाय विस्तारतर्फ उन्मुख भएका छन्।

चन्दननाथ नगरपालिका–८ कोटिला गाउँका ४७ वर्षीय धर्म बोहोराको अनुभव यस परिवर्तनको उदाहरण बनेको छ। उनको स्याउ बगैंचामा गोल्डेन, रेड डेलिसियससहित तीन जातका करिब ३०० बिरुवा छन्। ११ वर्गमिटर क्षेत्रफलमा फैलिएको बगैंचाबाट वार्षिक ३० देखि ४० क्विन्टलसम्म स्याउ उत्पादन हुने गरेको छ। तर उनले स्याउ व्यापारीलाई काँचै बिक्री गर्दैनन्। सबै उत्पादनलाई प्रशोधन गरी स्याउका चाना बनाएर बजारमा पठाउँछन्।