पत्रकार महासंघका नाममा प्रकाशन प्रसारण अवरोधको प्रयास

नेपाल पत्रकार महासंघको नाममा नेपाल रिपब्लिक मिडियामा तालाबन्दी गरी प्रकाशन प्रसारणलाई अवरोधको प्रयास गरिएको छ । महासंघका पदाधिकारीको नेतृत्वमा बुधबार बिहान नागरिक दैनिक, रिपब्लिका दैनिक, नागरिकन्युज र माइरिपब्लिका अनलाइनको प्रशासन संस्थान रिपब्लिकामा तालाबन्दी गरेको भए पनि पछि स्थानीय जनप्रतिनिधि र प्रहरीको रोहबरमा त्यसलाई हटाइएको थियो । नेपालको लोकतान्त्रिक आन्दोलनको पक्षमा वकालत गर्दै आएको एउटा सञ्चारमाध्यममाथि यसरी तालाबन्दी हुन आफैँमा दुःखद पक्ष हो ।

कुनै पनि प्रकाशन संस्थामा अवरुद्ध गर्न नहुने महासंघको विधान विपरीत रिपब्लिक मिडियामाथि अवरोध गर्न खोजिएको छ । महासंघले पत्रकारिताको विकासमा योगदान गर्नेभन्दा पनि यस संस्थामा काम छाडिसकेका कर्मचारीको विषयलाई लिएर धर्ना, तालाबन्दी र प्रकाशन संस्थाविरुद्ध नाराबाजी गर्ने काममा लगाएको छ । पारिश्रमिक वा अन्य कुनै सुविधाको विषयमा यहाँ कार्यरत बहालवाला कर्मचारीभन्दा बाहिरका व्यक्तिहरूले आक्रमणको प्रयास गरेका छन् । यहाँ कार्यरत पत्रकार तथा कर्मचारीले कामलाई निरन्तरता दिइरहेका अवस्थामा बाहिरबाट आएर प्रकाशनमा अवरोध गर्न खोज्नु निन्दनीय छ ।