नेपालगन्जमा दशौं लुम्बिनी प्रदेश स्तरीय महिला उद्यमी प्रदर्शनी सुरु

महिला उद्यमीले उत्पादन गरेका वस्तुको बजारीकरण र प्रवर्द्धन गर्ने उद्देश्यसहित दशौं लुम्बिनी प्रदेश स्तरीय प्रदर्शनी मेला नेपालगन्जमा बुधबारदेखि सुरु भएको छ। महिलाउद्यमी संघ नेपाल बाँकेको आयोजनामा प्रदर्शनी सञ्चालनमा आएको हो।

प्रदर्शनीको उद्घाटन नेपालगन्ज उपमहानगरपालिकाका मेयर प्रशान्त विष्टले गरे। उद्घाटन समारोहमा मेयर विष्टले महिलाउद्यमी संघले छोटो समयमा धेरै महिलालाई उद्यमशीलतामा जोड्दै उत्पादन र प्रवर्द्धनमा महत्वपूर्ण भूमिका खेलेको बताए। महिलाले उत्पादन गरेका वस्तुलाई बजारसँग जोडेर आर्थिक रूपमा सबल बनाउने काम संघले गर्दै आएको उल्लेख गर्दै उनले प्रदर्शनीले आपसी अनुभव आदान–प्रदान र उत्साह प्रदान गर्ने विश्वास व्यक्त गरे।