गठबन्धन तोड्न चौतर्फी षड्यन्त्र भइरहेको प्रचण्डको दाबी

काठमाडौं । प्रधानमन्त्री तथा नेपाल कम्युनिस्ट पार्टी (माओवादी केन्द्र) का अध्यक्ष पुष्पकमल दाहाल ‘प्रचण्ड’ सत्ता गठबन्धन तोड्न चौतर्फी षड्यन्त्र भइरहेको दाबी गर्नुभएको छ । आठ दलीय गठबन्धनको सहारामा प्रधानमन्त्री बनेका प्रचण्ड सत्ता सहयात्री दलका नेताहरूको पछिल्लो व्यवहार र प्रतिपक्षको भूमिकालाई लिएर सशंकित बन्नुभएको हो ।

पार्टीको वागमती प्रदेश भेलालाई सम्बोधन गर्दै मंगलबार प्रचण्डले यस्तो शंका व्यक्त गर्नुभएको हो । उहाँले भन्नुभयो– ‘यो गठबन्धन तोड्न धेरै कसरत भएका छन् । प्रतिक्रियावादी, अवसरवादीहरू र अतिवादीहरू अलि बढी विक्षिप्त भएर लागेका छन् । उनीहरूको अभिव्यक्ति सुन्नुभयो, उनीहरूको गतिविधि हेर्नुभयो भने विक्षिप्त भएको राम्रैसँग देख्न र सुन्न सक्नुहुन्छ । कसरी यो सरकारलाई बद्नाम गर्न सकिन्छ भनेर षड्यन्त्र गरिरहेका छन् ।’ यद्यपि, उहाँले गठबन्धन नतोडिनेमा कार्यकर्तालाई आश्वस्त पार्दै भन्नुभयो– ‘गठबन्धन तोड्न जो जसरी लागे पनि कसैको केही लाग्ने मैले देखेको छैन । ठूलो दुर्घटना भएन भने यो गठबन्धन ५ वर्ष जान्छ । गठबन्धन तोड्न जति बल गर्छन्, त्यति नै जनताको नजरमा गिर्दै जाने छन् ।’