जाडो याममा मसलाको प्रयोग कति उपयोगी ?

जाडो याममा प्रायः सबैलाई मीठो–मीठो खान मन पर्छ । आयुर्वेदानुसार यस बेला पेटको अग्निबल निकै तेज हुने गर्दछ, फलतः खाइएको सबै कुरा छिट्टै पच्ने हुन्छ । अलिक बढी नै खाए पनि सजिलै पच्छ । यस बेला भोक पनि राम्रो जाग्ने गर्दछ । जसले गर्दा यति बेला स्वादिलो र मीठो–मीठो खान मन पर्छ ।

खानालाई मीठो एवं स्वादिलो बनाउनका लागि विभिन्न खालका मसलाहरुको अधिक प्रयोग गरिन्छ । मसलाहरुले गर्मी दिने भएकोले यसको प्रयोगले शरीरलाई जाडो छल्न सजिलो हुन्छ । मसलाको प्रयोग बुद्धिमानीपूर्वक गरे मात्र मीठो र स्वादिलो खाना खाए पनि स्वास्थ्य बिग्रिन्न । मसलाहरुको प्रयोग सही रुपमा गर्न जानिएन भने यसले स्वास्थ्यलाई नराम्रोसँग बिगार्दछ । अन्यत्र भन्दा नेपाल एवं भारतमा मसलाको प्रयोग अधिक हुने गर्दछ । मसलाको प्रयोग नेपाली एवं भारतीयहरुको संस्कार एवं संस्कृतिको रुपमा रहेको छ । मसलाहरु स्वास्थ्यको लागि हानिकारक हुन् कि स्वस्थकर ? भन्ने प्रश्न पनि धेरैको मनमा होला । मसला स्वास्थ्यको लागि हानिकारक नै हुन्छ भन्ने धारणा पनि हुन सक्छ । वास्तविकता के हो त ?