तीन क्लबमा सय गोल गर्ने तीन फुटबलर

विश्व फुटबल इतिहासमा एक से एक खेलाडी जन्मेका छन् । कोही ड्रिब्लिंगमा सिपालु, कोही फ्रीकिकमा निपुण, कोही सटिक पासमा उपलब्घ गर्न माहिर त कोही गोल गर्नमा अब्बल । पेले, डिएगो म्याराडोना र लियोनेल मेसीको युगसम्म आइपुग्दा हामीले फुटबल दुनियामा गोल गर्न सिपालु थुप्रै फुटबलरहरुलाई पनि देखिसकेका छौं । ती मध्ये तीन जना मात्र यस्ता फुटबलरहरु छन् जसले विभिन्न तीन वटा क्लबबाट आफ्नो गोलसंख्या १ सय कटाएका छन् । ब्राजिलका स्टार फुटबलरद्वय रोमारियो र नेयमारसहित पोर्चुगलका जल्दाबल्दा सुपरस्टार क्रिस्टियानो रोनाल्डो यस्तो कारनामा गर्ने तीन गोल मेसिनहरु हुन् । यी तीन नाम मध्ये रोमारियो अलि वरिष्ठ छन् । हाल ५७ वर्षका उनले ब्राजिललाई सन् १९९४ को फिफा विश्वकप उपाधि दिलाउन महत्वपूर्ण योगदान गरेका थिए । जसका कारण उनले उक्त विश्वकपमा गोल्डेन बल समेत प्राप्त गरेका थिए । उनले जस्तो सफलताको अनुभव नेयमार र रोनाल्डोले भने अझै पाउन सकेका छैनन् ।

तुलनात्मक रुपमा होचा कद र रिसाहा स्वभावले विवादमा मुछिरहने रोमारियो आफ्नो समयमा विपक्षी रक्षापंक्तिका लागि सधै टाउको दुखाइका कारण बन्ने गर्थे । सन् १९९४ मा मात्र होईन, १९९० मा पनि ब्राजिल राष्ट्रिय टोलीका नामुद गोलकर्ता रोमारियोले आफ्नो करियरमा १२ वटा क्लबबाट खेलेका थिए । उनले ओलारिया, भास्को डी गामा, पिएसभी आइन्डओभेन, बार्सिलोना, फ्लेमेन्गो, भ्यालेन्सिया, फ्लूमिनेन्से, अल साड्ड, मायमी एफसी, एडलेड यूनाइटेड र अमेरिका आर–जेबाट खेलेका थिए । तथ्यांक अनुसार आफ्नो करियरमा ७ सय ५० भन्दा बढी गोल गरेका भनिएका रोमारियोले तीन विभिन्न क्लब पिएसभी आइन्डओभेन, भास्को डी गामा र फ्लेमेन्गोमा आफ्नो गोल संख्या १ सय पार गरेका थिए । उनले डच क्लब पिएसभी आइन्डओभेनबाट १ सय ६५ गोल गरेका थिए । त्यस्तै, दुई ब्राजिलियन क्लब भास्को डी गामाबाट २ सय सात गोल तथा फ्लेमेन्गोबाट १ सय १५ गोल गरेका थिए ।