प्रधानमन्त्रीज्यू, साँच्चै सुधार गर्ने हो ?

प्रधानमन्त्री पुष्पकमल दाहाल प्रचण्डले पटक–पटक मुलुकको आमूल सुधार गरी विकास र समृद्धिको वहार ल्याउने तथा भ्रष्टाचार अन्त्य गर्ने विषय दैनिकरुपमा नै व्यक्त गर्दै आउनुभएको छ । उहाँ बाहिर ठूलो सुधारकको रुपमा पेस हुनुहुन्छ तर कार्यशैलीले उहाँको सो सुधारको दैनिक अभिव्यक्तिलाई गिज्याउने काम गरेको देखिन्छ । त्यसैले पनि होला एक वर्ष पुग्नै लाग्दा उहाँको नेतृत्वको सरकार अलोकप्रियतातर्फ उन्मुख छ । आम जनतामा चौतर्फी असन्तुष्टि छ । विशेष गरी मूल्यवृद्धि, कालोबजारीले जनता वाक्कदिक्क छन् । कुशासनको ग्राफ पनि घट्न सकेको छैन । सरकारी संयन्त्र नाममात्रैका बन्न पुगेका छन् । मुलुकको समग्र विकास प्रक्रिया पनि निकै सुस्त छ । जनताका गाँस, बास, कपास, स्वास्थ्य, शिक्षा, सुरक्षा, रोजगारीका समस्या ज्यूँका त्यूँ छन् ।

असल र इमानदार कार्यशैली अपनाउने हो भने एक वर्षमा धेरै नै सुधारका मार्गहरु निर्माण गर्न सकिन्थ्यो तर त्यस्तो केही हुन सकेन । प्रधानमन्त्री, मन्त्री तथा उच्च पदस्थहरुमा एकथोक बोल्ने तर व्यवहारमा ठीक उल्टो गर्ने चरित्रले मुलुक दिनानुदिन संकटको भुमरीतर्फ फस्न गइरहेको छ ।