बागमतीमा एमाले-नेकपालाई बहुमत अपुग

बागमती प्रदेशको राजनीतिक समीकरण फेरिएको छ। सरकारमा सहभागी एमालेले सरकारलाई दिएको समर्थन फिर्ता लिँदै आफ्ना ६ जना मन्त्रीको सामूहिक राजीनामा दिएपछि मुख्यमन्त्री कांग्रेसका इन्द्रबहादुर बानियाँ नेतृत्वको सरकार अल्पमतमा परेको छ। बानियाँ २०८२ साउन २० गते एमाले र कांग्रेसका ६४ सांसदको समर्थनका साथ मुख्यमन्त्री बनेका थिए।

यससँगै प्रदेशमा नयाँ सत्ता समीकरण निर्माण प्रक्रिया सुरु भएको छ। केन्द्रको निर्देशनअनुसार एमालेका मन्त्रीहरूले बुधबार मुख्यमन्त्री तथा मन्त्रिपरिषद्को कार्यालयमा राजीनामा बुझाएका हुन्। एमाले बागमती प्रदेश संसदीय दलका नेता जगन्नाथ थपलियाका अनुसार संसदीय दलले केन्द्रको औपचारिक निर्णयपछि सरकारबाट बाहिरिने निर्णय कार्यान्वयन गरेको हो। सरकारबाट बाहिरिने एमालेका मन्त्रीहरूमा डा. दिनेशचन्द्र देवकोटा, भरत केसी, जयराम थापा, मधुसूदन पौडेल, किरण थापा र बिन्दु श्रेष्ठ रहेका छन्।