दालचिनी बिक्रीबाट वार्षिक १५ करोडभन्दा बढी भारतीय रुपैयाँ आम्दानी

बुटवल । पाल्पाको तिनाउ गाउँपालिका–३, फूलबारीका गुरुप्रसाद शर्माको १६ रोपनी जग्गामा दालचिनी खेती रहेको छ । उनका खरायन, पाखोबारीका डिल तथा कान्लामा दालचिनीका बुटा छन् ।

सुरुमा आफैँ उम्रिएका केही दालचिनीका बिरुवालाई संरक्षण गर्दै शर्माले बाँकी खालि जग्गामा पनि बिरुवा लगाए । ती दालचिनीको पात र ब्रोका बिक्री गरेर गत वर्ष उनले एक लाख ५० हजार रुपैयाँ आम्दानी गरेका थिए । अबको सिजनमा त्योभन्दा धेरै आम्दानी गर्ने उद्देश्य रहेको उनले रातोपाटीलाई बताए । तिनाउ ज्यामेरीकी मनमाया चिदीले पनि घरभन्दा तल खरायामा दालचिनी रोपेकी छन् ।