नेपाल-भारतबीच खेलकुद सम्बन्ध र भारतको उजुरी

नेपाल–भारतबीच रोटी–बेटीको सम्बन्ध भएजस्तै खेलकुदको पनि विशेष सम्बन्ध रहेको छ । भारतीय सेनामा भर्ती भएका कति नेपालीहरु भारतीय राष्ट्रिय खेलकुद प्रतियोगिताहरुमा राष्ट्रिय च्याम्पियन भएका छन् । उनीहरु भारतीय राष्ट्रिय च्याम्पियन भएर अन्तर्राष्ट्रिय खेलकुद प्रतियोगिताहरु एसियन गेम्स, कमनवेल्थ गेम्स, ओलम्पिक गेम्स, विश्व खेल च्याम्पियनसिप लगायत विश्व सैनिक खेलकुदमा पनि भारतको तर्फबाट सहभागी भएका छन् । सहभागी भएकाहरुमध्ये कति नेपालीले भारतका लागि अन्तर्राष्ट्रिय खेल पदकहरु दिलाएका छन् ।

अन्तर्राष्ट्रिय खेलकुद प्रतियोगिताहरुमा भारतका लागि अन्तर्राष्ट्रिय खेल पदक दिलाएकाहरुमध्ये चर्चित फुटबल खेलाडी श्याम थापा, पदमबहादुर मल्ल, जितु राईजस्ता धेरै छन् । पर्वतका पदमबहादुर मल्लले भारतका लागि बक्सिङ खेलको पहिलो अन्तर्राष्ट्रिय स्वर्णपदक दिलाएका थिए । उनले सन् १९६२ मा जाकर्तामा भएको चौथो एसियाली खेलकुद प्रतियोगितामा बक्सिङ खेलको ६० केजी तौल समूहमा विजयी तथा बेस्ट बक्सर भएर स्वर्णपदक जितेका थिए । त्यस्तै सखुवासभाका जितु राईले सन् २०१४ मा स्कटल्यान्डमा सम्पन्न भएको बीसौँ कमनवेल्थ गेम्समा १० मिटर पेस्तोल सुटिङ प्रतियोगितामा विश्व रेकर्डसहित भारतका लागि स्वर्णपदक जिताए । सोही वर्ष साउथ कोरियामा भएको सत्रौँ एसियाली खेलकुदमा ५० मिटर पेस्तोल सुटिङ प्रतियोगितामा भारतका लागि अर्को स्वर्णपदक दिलाए । अन्तर्राष्ट्रिय खेलकुद प्रतियोगिताहरुमा भारतका लागि अन्तर्राष्ट्रिय खेल पदक दिलाएर भारतको प्रतिष्ठा उच्च बनाउनेहरुका लागि भारत सरकारले राष्ट्रिय मान–सम्मानसहित आर्थिक तथा भौतिक सहयोग गर्ने हुनाले जितु राईजस्ता नेपालीहरु भारतमा नै बसाइँ सरे ।