जयवल्लभ भट्टको 'पुर्खाका पाइला' विमोचित

काठमाडौँ । पाँच दशकभन्दा बढी समय शिक्षण पेसामा समर्पित बैतडीका ९० वर्षीय समाजसेवी तथा सर्जक जयवल्लभ भट्टद्वारा रचित संस्मरणात्मक काव्यकृति ‘पुर्खाका पाइला’ काठमाडौँमा आयोजित एक विशेष समारोहका बीच लोकार्पण गरिएको छ।

अम्बिका भट्टको अध्यक्षतामा सम्पन्न उक्त विमोचन समारोहका प्रमुख अतिथि पूर्वप्रधानमन्त्री झलनाथ खनालले कृति लोकार्पण गर्दै कला र साहित्य साधनाका लागि उमेर कहिल्यै बाधक नबन्ने बताए। ९० वर्षको परिपक्व उमेरमा पनि भट्टले देखाएको अगाध साहित्यिक सक्रियता, सिर्जनशीलता र तन्नेरी जाँगर नयाँ पुस्ताका लागिसमेत अत्यन्त प्रेरणादायी रहेको उनको भनाइ थियो।