पहिलो मातृभाषी पत्रकारलाई राज्यको मान्यता देऊ : दबु

काठमाडौं । नेवाः पत्रकार राष्ट्रिय दबुले नेपाल टेलिभिजनमा नेपाल भाषाका माध्यमबाट पनि समाचार प्रसारण गर्नका लागि आवश्यक पहल गर्न सञ्चारमन्त्री रेखा शर्मा र नेपाल टेलिभिजनका महाप्रबन्धक फुलमान बललाई ध्यानाकर्षणपत्र बुझाएको छ ।

दबुका अध्यक्ष नृपेन्द्रलाल श्रेष्ठको नेतृत्वमा मन्त्री शर्मालाई बुझाइएको ध्यानाकर्षणमा मातृभाषा पत्रकारिताको विकास र विस्तारका लागि राज्यबाट थप सहुलियत, सुविधालाई नीतिगत रूपमा सम्बोधन गर्न सूचना तथा सञ्चार प्रविधि मन्त्रालयले प्रभावकारी भूमिका निर्वाह गर्न माग गरिएको छ ।