नाडा र प्रधानमन्त्रीबिच अटोमोवाइल व्यवसायबारे छलफल

काठमाडौँ । नाडा अटोमोबाइल्स एसोसिएसन अफ नेपाल (नाडा) का अध्यक्ष करण चौधरीको नेतृत्वमा गएको प्रतिनिधि मण्डलले प्रधानमन्त्री सुशीला कार्कीसँग भेट गरी हालको जटिल परिस्थितिले अटोमोबाइल व्यवसायमा पारेको असरबारे छलफल गरेको छ।

छलफलमा अध्यक्ष चौधरीले व्यवसायीको सुरक्षा, शान्ति र अमनचयनलाई प्राथमिकता दिनुपर्ने र सरकारले स्पष्ट रोडम्याप बनाए अटोमोबाइल व्यवसाय गतिशील हुने धारणा राखे। नाडाले प्रधानमन्त्रीसमक्ष २२ बुँदे सुझाव पेस गरेको छ। तीमध्ये पेट्रोल तथा डिजेल गाडीका लागि बैङ्कबाट उपलब्ध हुने मूल्य–ऋण अनुपात हालको ६० प्रतिशतबाट बढाएर ८० प्रतिशत पुर्‍याउनुपर्ने र नेपाल सवारी प्रदूषण मापदण्ड २०८२ कार्यान्वयनले सिर्जना गरेको चुनौतीबारे समाधान खोज्नुपर्ने माग प्रमुख छन्। साथै, उद्योग प्रवर्द्धन परिषदमा नाडाको प्रतिनिधित्वको माग पनि राखिएको छ।