दुई सातादेखि मलखाद वितरण रोकिँदा किसान समस्यामा

कपिलवस्तुका किसान लामो समयदेखि रासायनिक मल नपाउँदा मारमा परेका छन्। यस वर्ष वर्षा पनि कम भएकाले चिन्तित बनेका किसान दुई सातायता कृषि सामग्री कम्पनी लिमिटेड र साल्ट ट्रेडिङ कर्पोरेसनले मलखाद वितरण रोकेपछि थप समस्यामा परेका हुन्।

गत असार ३१ गतेपछि कृषि सामग्री कम्पनी लिमिटेड तौलिहवा र बहादुरगञ्ज शाखा तथा साल्ट ट्रेडिङ कर्पोरेसन कृष्णनगरबाट मलखाद वितरण कार्य रोकिएको कृषि ज्ञान केन्द्रका प्रमुख तथा जिल्ला मल व्यवस्थापन समितिका सचिव घनश्याम चौधरीले बताए। उनका अनुसार असार ३१ गतेयता ती स्थानबाट मलखाद वितरण भएको जानकारी प्राप्त भएको छैन।