भारतीय अभिनेता राकेश बेदी काठमाडौँमा

काठमाडौँ । शुक्रबारबाट नेपालमा समेत प्रदर्शनमा आएको हिन्दी चलचित्र ‘है जवानी तो इश्क होना है’ को प्रचार प्रसारका लागि वरिष्ठ बलिउड (भारतीय) अभिनेता राकेश बेदी नेपाल आएका छन् । उनी मध्यान्ह २ बजे त्रिभुवन अन्तर्राष्ट्रिय विमानस्थल पाइपुगेका हुन् ।

उनलाई विमानस्थलमा नियोम फिल्म्स र क्यापिटल वर्ल्ड ग्रुपका वितरकहरू कश्यप नरेन्द्र वेद र नवीन उदासले स्वागत गरे । नेपाल र भारतबिचको चलचित्र उद्योगको सहकार्यलाई थप सुदृढ बनाउने उद्देश्यका साथ नियोम फिल्म्स र क्यापिटल वर्ल्ड ग्रुपका वितरकहरू वेद र उदासले यो भ्रमणको आयोजना गरेका हुन् ।

यो समूहले नेपालमा दक्षिण भारतीय चलचित्र ‘पेड्डी’ को प्रदर्शन व्यवस्था मिलाएको छ । भ्रमणका क्रममा अभिनेता बेदीले काठमाडौँका विभिन्न चलचित्र मन्दिर (थिएटर) हरूको भ्रमण गरी दर्शक तथा हल सञ्चालकहरूसँग प्रत्यक्ष साक्षात्कार गर्नेछन् ।

यसका साथै उनले आराध्यदेव पशुपतिनाथ मन्दिरको दर्शन पनि गर्ने कार्यक्रम रहेको छ । बेदीले नेपाल आएका समय चलचित्र ‘है जवानी तो इश्क होना है’ बारे जानकारी गराउँदै सञ्चारकर्मीहरूसँग अन्तर्क्रिया समेत गर्ने बताइन्छ ।

बेदीको यो भ्रमणले नेपाल र भारतको चलचित्र क्षेत्रबिचको बढ्दो साझेदारीलाई प्रतिनिधित्व गर्ने र चलचित्रको माध्यमबाट दुवै देशका दर्शकहरूलाई अझ नजिक ल्याउन सहयोग पुग्ने अपेक्षा गरिएको छ ।