फार्मेसी परिषद् सदस्य नियुक्ति प्रक्रियाप्रति फार्मेसी संघको गम्भीर आपत्ति

काठमाडौं- स्वास्थ्य तथा खाद्य स्वच्छता मन्त्रालयले नेपाल फार्मेसी परिषद्को सदस्य नियुक्तिका लागि सुरु गरेको छनोट प्रक्रियामा निष्पक्षता र पारदर्शिता नदेखिएको भन्दै नेपाल फार्मेसी संघले गम्भीर आपत्ति तथा कडा विरोध जनाएको छ।

नेपाल फार्मेसी परिषद् ऐन, २०५७ को दफा ५(१)(ङ) बमोजिम सदस्य नियुक्तिका लागि आवेदन प्रक्रिया अघि बढाई २०८३ भदौ १७ गते अन्तिम नामावली प्रकाशन तथा भदौ १८ गते अन्तर्वार्तासमेत सम्पन्न भइसकेको थियो। तर, उक्त अन्तर्वार्ताको नतिजा सार्वजनिक नगरी २१ दिनपछि (२०८३ असोज ८ गते) 'भुलवश छुटेको' बहानामा पुनः नयाँ संस्था तथा व्यक्तिहरूलाई समावेश गरी अन्तर्वार्ताका लागि सूचना प्रकाशित गरिनु अत्यन्तै गम्भीर र आपत्तिजनक रहेको संघले जनाएको छ। संघले यति लामो समयपछि नयाँ नाम समावेश गरिनुको कारण र कानुनी आधार स्पष्ट पार्न मन्त्रालयसँग माग गरेको छ।