इसेवाको प्रमुख कार्यकारी अधिकृतमा निरज शर्मा नियुक्त

काठमाडौँ । नेपालको अग्रणी भुक्तानी सेवा प्रदायक कम्पनी इसेवा लिमिटेडको प्रमुख कार्यकारी अधिकृत (सीईओ) मा निरज शर्मा नियुक्त भएका छन्। गत भाद्र ३० गते बसेको इसेवा सञ्चालक समितिको बैठकले असोज १२ गतेदेखि लागू हुने गरी शर्मालाई चार वर्षका लागि सीईओमा नियुक्त गर्ने निर्णय गरेको हो।

नवनियुक्त शर्मासँग बैंकिङ तथा वित्तीय क्षेत्रमा २५ वर्षभन्दा बढीको अनुभव छ। उनी ट्रान्जेक्सन बैंकिङ, कार्ड प्रणाली, डिजिटल रूपान्तरण तथा रिटेल बैंकिङ क्षेत्रका अनुभवी मानिन्छन्। बैंकिङ तथा डिजिटल वित्तीय सेवामा उनको लामो अनुभव, नेतृत्व क्षमता र विज्ञताले कम्पनीको रणनीतिक प्राथमिकतालाई अघि बढाउन र आगामी यात्रालाई थप सुदृढ बनाउन ठूलो योगदान पुग्ने विश्वास इसेवा सञ्चालक समितिले लिएको छ।